EROTISME SAJRONE CRITA CEKAK JAWA MODERN TAUN 2012 TINTINGAN SOSIOLOGI SASTRA

Abstract

Abstrak

Erotisme wis suwe ana lan ngrembaka sajrone maneka perangan karya seni kayata seni beksan, swara, rupa, drama sarta karya sastra. Sajrone karya sastra tema-tema erotis ana minangka panyengkuyung pangrembakane sastra Jawa modern.Sejatine erotisme ora mung gegayutan karo prekara seks nanging uga minangka wujude interaksi sosial.Panliten iki uga bakal ndudah erotisme sajrone crita cekak Jawa modern taun 2012 kanthi nggunakake tintingan sosiologi sastra.Underane panliten iki yaiku (1) kepriye wujude erotisme; (2) kepriye kagunane erotisme; sarta (3) kepriye sesambungane erotisme sajrone crita cekak 2012 karo realitas sosial sajrone bebrayan. Tujuwan saka panliten iki yaiku (1) ngandharake wujude erotisme; (2) ngandharake kagunane erotisme; sarta (3) njlentrehake sesambungane erotisme sajrone cerkak sastra Jawa modern taun 2012 karo realitas sosial sajrone bebrayan.

Metode sing digunakake sajrone panliten yaiku metode deskriptif kualitatif. Sumber datane panliten arupa crita cekak saka kalawarti Jaya Baya lanPanjebar Semangat taun 2012. Datane panliten yaiku frase, tembung lan ukara sajrone crita cekak Jawa modern taun 2012. Sajrone nglumpukake data kasebut digunakake teknik kapustakan. Sajrone ngandharake lan njlentrehake data digunakake metode deskriptif analisis kanthi tintingan sosiologi sastra.

                    Asile panliten iki bisa diperang dadi telu adhedhasar underane panliten. Sepisan, wujud-wujude erotisme kang ana sajrone crita cekak Jawa modern taun 2012 ana papat, yaiku (1) gambarane wanita; (2) gambarane planangan; (3) silih aras lan rinuketan; (4) gambarane andon asmara. Kagunane erotisme sajrone crita cekak Jawa modern taun 2012 ana pitu yaiku (1) narik kawigatene pamaca; (2) sarana estetika; (3) salah sijine wujud interaksi sosial; (4) sarana kritik sosial lan moral; (5) konsekuensi logis; (6) gambaran panguripane manungsa kanthi wutuh; (7) sawijine bab sing lumrah. Realitas sosial sing nduweni sesambungan karo erotisme yaiku (1) slingkuh; (2) seks bebas; (3) seks minangka kabutuhane wong sesomahan; lan (4) tumindak seks sing abnormal.

Tembung wigati: wujude erotisme, kagunane erotisme, realitas sosial