ASAL-USUL DUMADINE ARAN DESA ING KECAMATAN PULUNG KABUPATEN PONOROGO

Abstract

Kecamatan Pulung minangka salah sawijine kecamatan sing manggon ing Kabupaten Ponorogo. Kecamatan
kasebut minangka kecamatan sing kawentar babagan Raden Pakubuwono II lan para prajurite. Kecamatan iki uga
minangka salah sawijine kecamatan kang kawentar babagan senine. Sethithik ngenani legendha desa ing Kecamatan
Pulung, amung sithik para muda sing mangerteni. Kahanan iki ndadekake salah sijine alesan kanggo panliti uga upaya
kanggo ndhokumentasekake arane desa lan crita asal usule desa ing Kecamatan Pulung minangka aseting budaya daerah
ing Indonesia. Asil panliten iki nduweni paedah teoritis yaiku bisa aweh kawruh ngenani crita rakyat ing satengahe
masyarakat. Dene paedah praktise bisa nambahi sumbangan wawasan ngenani sastra lisan kanggo pamaca.
Panliten iki nggunakake teori onomatologi. Teori onomatologi ing kene kanggo nljentrehake ngenani asal lan
makna saka papan panggonan. Konsep onomatologi uga nuduhake anane aspek teges, makna lan pangaribawa saka crita
kang ana ing desa. Panliten iki nggunakake ancangan panliten dheskriptif kualitatif. Dhata sajrone panliten iki awujud
dhata lisan lan non lisan. Sumber dhatane bisa diperang dadi loro, yaiku sumber dhata primer lan sekunder.
Asile panliten iki bisa kaperang dadi telung perangan. Perangan kapisan, mula bukane aran desa Kesugihan,
desa Munggung, desa Patik, desa Pomahan, desa Pulung, desa Pulung Merdiko, desa Singgahan, desa Wagir Kidul,
desa Wayang, lan desa Wotan. Perangan kapindho, teges lan makna aran desa ing Kecamatan Pulung kang wis klebu
sajrone konsep Onomatologi. Perangan katelu, pangaribawane aran desa-desa tumrap generasi muda, dewasa lan tuwa
lumantar wawancara kang wis katindakake panliti.
Tembung wigati : legendha, aran desa, onomatologi.