PRESUPOSISI SAJRONE TINDAK TUTUR ILOKUSI KAPERCAYAN/KONSTATIF MISUHI ING DESA PANDITAN, KECAMATAN LUMBANG, KABUPATEN PASURUAN

Abstract

ABSTRAK

Presuposisi mesthi ana ing saben tindak tutur nanging asring ora disadari dening panutur lan mitratutur. Kayata sajrone tindak tutur misuhi (TTMi). Masyarakat asring nggunakake TTMi kanggo medharake rasa emosinale. Mulane sadurunge nuturake tuturan misuhi, panutur mesthi nduweni pangira-ira kanggo nemtokake anggepan dhasar ngenani apa kang arep dituturake. Undhere panliten iki, yaiku apa wae jinis lan pola wujud titikane presuposisi sajrone tindak tutur ilokusi kapercayan/konstatif Misuhi ing desa Panditan, kecamatan Lumbang, Kabupaten Pasuruan. Paedahe panliten iki diperang dadi loro, yaiku (1) paedah teoretis, yaiku diajab bisa ngrembakakake ilmu basa Jawa, lan (2) paedah praktise yaiku bisa kanggo bahan referensi ing pasinaon.

Panliten iki nggunakake teori semantik pragmatis kang diganthukake karo teorine Yule (2006) ngenani jinise presuposisi. Panliten iki kalebu jinis etnografi. Dhata diklumpukake kanthi nggunakake methode semak, guneman (libat cakap), lan sadhap. Dhata diandharake kanthi methode deskriptif kanthi landhesan konteks lan aspek sosial. Banjur disuguhake kanthi methode informal. Asil saka panliten iki nemokake 18 jinis PrTTMi, yaiku kanthi nggatukake nem jinis presuposisi, yaiku (1) presuposisi eksistensial, (2) presuposisi faktif, (3) presuposisi non faktif, (4) presuposisi leksikal, (5) presuposisi struktural, lan (6) presuposisi konterfaktual karo jinise misuhi kang ana telu, yaiku (1) misuhi kanthi tataran pangrasa nepsu asor, (2) misuhi kanthi tataran pangrasa nepsu sedhengan, lan (3) misuhi kanthi tataran pangrasa nepsu dhuwur. Dene pola wujud titikane arupa tembung, gatra, lan ukara gatra kang ana sajrone tuturane panutur.

Tembung wigati : Presuposisi, Tindak tutur ilokusi kapercayan/konstatif misuhi