INFERENSI SAJRONE TINDAK TUTUR PERLOKUSI NGARIH-ARIH ING DESA PETIKEN, KECAMATAN DRIYOREJO, KABUPATEN GRESIK

Abstract

Inferensi minangka salah siji topik semantik pragmatis sajrone tindak tutur. Saben tindak tutur mesthi ana inferensine nanging ora disadari dening mitratutur, kayata sajrone tindak tutur ngarih-arih. Masyarakat asring nggunakake tindak tutur ngarih-arih kanggo mangaribawani mitratutur saengga nindakake apa kang dikarepake panutur. Inferensi sajrone tindak tutur perlokusi ngarih-arih dianalisis kanggo mbuktekake yen ana sesambungan antarane semantik lan pragmatik. Undere panliten iki, yaiku urutan proses inferensi lan asile inferensi sajrone tindak tutur perlokusi ngarih-arih ing Desa Petiken, Kecamatan Driyorejo, Kabupaten Gresik. Tujuwan utama sajrone panliten iki yaiku kanggo ngandharake lan njlentrehake inferensi sajrone tindak tutur perlokusi ngarih-arih ing Desa Petiken, Kecamatan Driyorejo, Kabupaten Gresik. Dene tujuwan mligine yaiku kanggo ngandharake lan njlentrehake urutan proses lan asile inferensi sajrone tindak tutur perlokusi ngarih-arih ing Desa Petiken, Kecamatan Driyorejo, Kabupaten Gresik. Paedahe panliten iki yaiku diajab bisa ngrembakakake ilmu basa Jawa lan bisa kanggo bahan referensi ing pasinaon.

Panliten iki nggunakake teori semantik pragmatis kang digathukake karo teorine Solso (2008) ngenani urutan proses inferensi. Panliten iki kalebu jinis etnografi. Dhata ing panliten iki yaiku inferensi sajrone tindak tutur perlokusi ngarih-arih. Sumber dhata panliten iki yaiku tindak tutur perlokusi ngarih-arih. Dhata sajrone panliten iki diklumpukake kanthi metodhe semak, guneman, lan wawancara. Dhata diandharake nggunakake metodhe deskriptif kanthi landhesan konteks lan aspek sosial. Banjur disuguhake kanthi nggunakake metodhe informal. Asil saka panliten iki nemokake 6 jinis urutan proses inferensi sajrone tindak tutur perlokusi ngarih-arih yaiku, (1) ngolah inferensi kanthi topikal, (2) ngolah inferensi kanthi tematis, (3) menebake inferensi kanthi spesial, (4) menebake inferensi kanthi general, (5) mantepake inferensi kanthi komparitas, lan (6) mantepake inferensi kanthi similaritas. Dene asile inferensi ditemokake ana loro yaiku, (1) dedhuktif lan (2) indhuktif. Jinise inferensi kang ditemokake ana 5 yaiku, (1) silogisme kategoris, (2) silogisme hipotesis, (3) entimem, (4) generalisasi, lan (5) analogi indhuktif. Strategi ngarih-arih sing digunakake ana 5, yaiku (1) agregatif, (2) insentif, (3) emosional, (4) motivatif, lan (5) humoristis.

Tembung wigati: Inferensi, tindak tutur perlokusi ngarih-arih