CRITA RAKYAT ING KABUPATEN KEDIRI (TINTINGAN ARKETIP CARL GUSTAV JUNG LAN FUNGSI FOLKLORIS)

Abstract

ABSTRAK

Crita rakyat Kediri minangka perangan saka karya sastra lisan mesthi ngandhut kaca pangilon lan citra masyarakat penyengkuyunge (masyarakat Kediri) kang tuwuh saka ketidaksadaran kolektif kang isi-isi fisike diwarisake lan dibacutake saka sawijine generasi neng generasi bacute minangka potensi psikis kang diarani arketip lan minangka sastra lisan mesthi nduweni fungsi kang migunani tumrap kauripan. Fungsi-fungsi kasebut bisa ditliti supaya bisa dimangreteni makna lan perane sajrone masyarakat panyengkuyunge kanthi tumemen.

Bab kang bakal dirembug utawa underan sajrone panliten iki yaiku (1) Apa wae arketip kang ana sajrone crita rakyat ing Kabupaten Kediri, (2) Apa wae fungsi crita rakyat ing Kabupaten Kediri tumrap masyarakat penyengkuyunge. Salaras kalawan underan panlitene, ancas saka panliten iki yaiku (1) njlentrehake arketip kang ana sajrone crita rakyat ing Kabupaten Kediri lan (2) njlentrehake fungsi crita rakyat ing Kabupaten Kediri. Panliten iki mujudake panliten kuwalitatif. Sumber dhatane yaiku saka antologi Crita Rakyat Kediri Jawa Timur dening Suharmono Kasiyun. Dhata sajrone panliten iki arupa ukara lan wacana kang wujude kutipan utawa cuplikan-cuplikan, sarta paragraf kang nduweni sesambungan kalawan underan panliten.

Adhedhasar underan panlitene, asil saka panliten iki ana loro. Asil kaping pisan yaiku anane arketip sajrone antologi Crita Rakyat Jawa Timur. Arketip kasebut yaiku arketip persona, ayang-ayang, anima lan animus, wong lanang kang wicaksana, satriya, lan dhiri. Arketip kang kasil ditemokake kasebut ana kang mawujud figur arketipal, kahanan arketipal kang dituduhake kanthi anane kadadean kang wigati, lan ana kang kanthi wujud imaji arketipal kang dituduhake kanthi lambang-lambang. Kaping pindho yaiku anane fungsi folkloris saka crita rakyat ing Kabupaten Kediri. Fungsi kasebut ing antarane yaiku anane fungsi crita rakyat minangka sistem proyeksi, minangka pangesahan pranata lan lembaga kabudayan, piranti kanggo meksa lan ngawasi masyarakat supaya gelem manut marang norma-norma sosial, lan piranti pasinaon kanggo bocah.