Tradhisi Sedhekah Bumi sajrone Serat Sindujaya (Suntingan Teks lan Pamarekan Antropologi Sastra)

Abstract

Abstrak

Naskah Serat Sindujaya mujudake sawijine asil reriptan sastra kang klebu naskah Jawa Pesisir ditulis migunakake aksara Arab pegon. Naskah Serat Sindujaya kang ditliti minangka naskah salinan jalaran ana bab kang owah sajrone teks lan narik kawigaten kanggo ditliti, amarga nyritakake tumindhak becike santri marang kyaine kang tekan seprene bisa dadi sumber piwulang. Naskah kasebut uga ngandhut sawijine tradhisi kang anane tansah diugemi dening masyarakat.

Gayut karo andharan mau, bisa dijupuk dudutan underan ing panliten iki yaiku (1) Kepriye dheskripsi naskah Serat Sindujaya?, (2) Kepriye suntingan teks naskah Serat Sindujaya?, (3) Kepriye wujud tradhisi sedhekah bumi sajrone naskah Serat Sindujaya?, lan (4) Kepriye aktualisasi tradhisi sedhekah bumi tumrap masyarakat Gresik?. Paedah ing panliten iki kanggo nggampangake lan nambah wawasan pamaca ngenani kandhutan isi naskah Serat Sindujaya bab tradhisi sedhekah bumi. Ancangan panliten iki migunakake methode analisis dheskriptif kualitatif arupa pangetrape teori filologi lan teori hermeneutika kanggo nafsirake isi lan makna sajrone reriptan sastra. Sumber dhata kang digunakake yaiku teks basa Jawa arupa aksara arab pegon. Dhata panlitene awujud tembung lan ukara kang nggambarake tradhisi sedhekah bumi sajrone Serat Sindujaya. Cara kanggo ngumpulake dhata migunakake teknik kapustakan yaiku kanthi migunakake sumber data awujud tulisan.

Asil panliten iki ngandharake dheskripsi naskah SS, Suntingan teks naskah SS, wujud tradhisi sedhekah bumi sajrone naskah SS minangka ajaran saka leluhur sing wis mbabat alas ing desa Keroman lan Lumpur kutha Gresik. Tradhisi sedhekah bumi kasebut disengkuyung karo tradhisi liya yaiku pagelaran wayang, pencak macan, lan macapatan. Bab kasebut banjur digayutake lan dibandhingake karo panguripan masyarakat Gresik.

Tembung Wigati : Tradhisi sedhekah bumi, Serat Sindujaya.