TRADHISI ULUR-ULUR ING TLAGA BURET DESA SAWO KECAMATAN CAMPURDARAT KABUPATEN TULUNGAGUNG

Abstract

TRADHISI ULUR-ULUR ING TLAGA BURET DESA SAWO KECAMATAN CAMPURDARAT KABUPATEN TULUNGAGUNG

Muhammad Fajar Assidiqi

S-1 Jurusan Pendhidhikan Basa lan Sastra Dhaerah (Jawa), Fakultas Basa lan Seni, Universitas Negeri Surabaya

muhammadassidiqi16020114002@mhs.unesa.ac.id

Yohan Susilo, S.Pd.,M.Pd.

Dhosen Jurusan Pendhidhikan Basa lan Sastra Dhaerah (Jawa), Fakultas Basa lan Seni, Universitas Negeri Surabaya

Abstrak

Tradhisi Ulur-Ulur yaiku arupa ritual wujud syukur masyarakat sing ana ing Tlaga Buret nggunakake piranti patung cacahe loro minangka Jaka Sedana lan Dewi Sri. Tujuwane supaya sumber banyu sing ana ing Tlaga Buret luwih ngrembaka bisa ngaliri sawah-sawah sing ndadekake tandurane tansaya ngrembaka. Underan panliten yaiku 1) kepriye mula bukane TUU ing Tlaga Buret, 2) Kepriye tata lakune adicara TUU, 3) Apa wae ubarampe sajrone TUU, 4) Kepriye makna ubarampe sajrone TUU, 5) Kepriye aspek fungsi sajrone TUU, 6) Kepriye wujud owah-owahan TUU. Paedah sajrone panliten, nambah kawruh ngenani TUU, ngrembakakae kabudayan Jawa TUU, bisa dhokumentasi tumrap masyarakat supaya tansah nguri-uri, mangerteni owah-owahan TUU minangka pambeda jaman mbiyen lan saiki.

Tradhisi Ulur-Ulur ditintingi nggunakake tintingan folklor. Gegayutan karo makna lan simbol saka tradhisi nggunakake teorine Tunner. Analisis marang fungsi Tradhisi Ulur-Ulur sesambetan kaliyan teori saking Bascom lan Alan Dundes lan digayutake karo perangan kabudayan dening Koentjaraningrat. Dene owah-owahan tradhisi nggunakake teori dening Sukarman. Metodhe sing digunakake yaiku dheskriptif kualitatif. Sumber dhata panliten, primer yaiku TUU arupa tumindak lan tetembungan asil wawancara langsung. Dene sekunder yaiku dhokumentasi foto, vidheo, buku-buku, lsp. Dhata panliten awujud tetembungan, ukara, gambar, lan wacana. Asile panliten nuduhake TUU ditindakake ing Tlaga Buret ing wulan Sela, dina Jemuah Legi. Tata lakune kawiwitan pambuka, arak-arakan, ritualan, panutup. Ubarampe digunakake TUU yaiku Mule metri, pupusing puspa arum, maesagung, kelemahan (pala pendhem), beras kuning, boreh wangi, mori, pari, cok bakal, sajen, dupa, mahkutha.

Tembung Wigati : Folklor, Tradhisi Ulur-Ulur